Un incuintri che si fâs pe prime volte. Une esperience che e je un apontament di no pierdi par cui che al vûl lâ fûr des convenzions. Lunis ai 8 di Setembar, aes 9 sot sere, la glesie de Madone de Taviele, un piçul tesaur romantic te campagne di Madrîs di Feagne, e deventarà il spazi di un event speciâl par cure dal “Salotto Musicale”, il Tinel musicâl dal F-Vj. Al centri, lis straordenariis sculturis sonoris dal artist rus Yuri Kalendarev (1947-2020), un dissident che al è stât par agnorums in Italie. Daspò di une lungje ricercje sul granît e la Land Art, la art de tiere, Kalendarev al tacà a lavorâ il bronç. Il risultât a forin lis sôs lastris di bronç, “Sound Plates”, buinis di gjenerâ ossilazions che a durin cualchi minût, vierzint paisaçs di sunôrs di bielece penze e misteri. Lis lastris a saran sunadis di Roberto Dani, un dai plui origjinâi percussioniscj de sene contemporanie, che al insegne tal conservatori di Triest e al è un musicist bon di passâ teritoris diferents, dal jazz ae danze, al teatri musicâl. Tal 2007 al à cognossût Kalendarev e di chê volte al è sunât lis lastris – ancje dopo de muart dal artist – in lûcs impuartants: la Bienâl di Vignesie, il Festival di Spoleto e ancje a S. Peterburc, là che Kalendarev al jere nassût. (A.I.) – 08-09.2025
Foto di G. Daniotti
