Musiche sacre a Pordenon cun Francesc, il Sant “mat”

La trentesime cuinte edizion dal Festival internazionâl de musiche sacre, promovude di “Presenza e Cultura” sot la direzion artistiche dai maestris Franco Calabretto e Eddi De Nadai, si vierç joibe ai 11 a Pordenon tal domo di S. Marc cuntune produzion musicâl dedicade a un episodi storic de vite di S. Francesc, cetant atuâl par chel che il mont al è daûr a vivi tal dì di vuê. “Fede e Eresie” al è il teme dal gnûf program di trê agns dal festival, e l’event si cree al puarte ducj indaûr al timp de cuinte crosade: cuant che i musulmans a vevin riconcuistât Jerusalem, e il sultan al veve ufiert di tornâle ai cristians se a finivin la vuere. Ma il rapresentant dal pape al veve refudât la ufierte e sburtât i crosâts a continuâ la bataie. Al è l’an 1219 e Francesc si met tal cjâf di lâ a cjatâ il Sultan dal Egjit: un at “mat” e rivoluzionari. E al è propit chel incuintri storic che al dâ sostance narative ae partidure teatrâl “Il Santo folle”, prodote dal festival di Pordenon cun chês di Ravenna e di Bolzan e di Trent, cun test di Guido Barbieri e musichis di Marcello Fera. (A.I.) – 10.06.2026