Musiche liriche par ducj in place a Udin

Miercus ai 19, aes 6 di dopomisdì, place S. Jacum a Udin si trasformarà intun palc di sene tal viert par un incuintri dedicât al podê di fâ musiche ducj adun e al valôr dal lavôr comunitari. Tal “Bar San Giacomo”, la associazion Operaprima-Wien e promôf un “Cultur-Music-Mob”, un moment di dialic e condivision viert al public, in preparazion de gnove produzion de “Madame Butterfly” di Giacomo Puccini, che e sarà rapresentade te Vile Sabbatini di Puçui ai 28 e ai 30 di Avost e al prin di Setembar. Di nûf agns, Operaprima-Wien e ufrìs al public une esperience culturâl origjinâl, imbinant un alt valôr artistic cuntun coinvolziment locâl atîf. Il “Cultur-Music-Mob” al è nassût propit tant che espression di cheste filosofie, proponint un dibatiment dinamic e viert sul rûl sociâl e culturâl de musiche. Une oportunitât par esplorâ la opare mestre di Puccini e dutis lis fasis che a vegnin prime e che a compagnin la metude in sene de opare. A vuidâ il dialic a saran il musicolic Alessio Screm e il diretôr artistic de Operaprima-Wien, Tiziano Duca, sostignûts dai cjantants e dai zovins locâi che a son stâts cjapâts dentri par creâ lis senis e i moviments dal palc. (A.I.) – 18.08.2026