Musiche dal vîf cence confins a Gurize e Gnove Gurize

Da miercus ai 27 e fint a domenie ai 31 di Avost, Gurize e gnove Gurize a deventin il palc naturâl di “GongFest”, la rassegne che e je dentri dal program uficiâl di “Go! 2025 – capital europene de culture. Une rassegne che e met dongje teritoris, lenghis e sunôrs, cu la propueste di cinc zornadis di musiche in lûcs e spazis diferents, tal segn dal dialic culturâl e de sperimentazion. Il confin jenfri Italie e Slovenie si disfe intune mape di suns che e valorize lis conessions gnovis. Si tache miercus ai 27 cul dopli conciert tal comun di Gnove Gurize dal David Mozetič 5Tet e dal grop dal centri VDC Ajdovščina-Vipava. Joibe ai 28 e sarà invezit dedicade al event plui grant: tal anfiteatri SNG di Gmove Gurize al rive Shabaka Hutchings, un dai protagoniscj de gnove sene jazz mondiâl. Di vinars ai 29 la rassegne si sposte a Gurize cun ospits di dopomisdì e sot sere – Kalimbata, Junkologist, Wandalumen… –, prime di sierà domenie ai 31 li dal “Epic” di Gnove Gurize. (A.I) – 26.08.2025