More than Jazz, si tache cu la orchestre inclusive

Un laboratori par dut l’Istât, bon di instreçâ la musiche contemporani cun produzions europeanis, lant di là dai ‘confins’ dal jazz par promovi une culture dal spetacul dal vîf vierte a sperimentazion e e inovazion. La setime edizion di “More than jazz”, plui che dome jazz, inmaneade di SimulArte, e à sielt il titul “Harmony Across Centuries”, armoniis vie pai secui, par contâ il dialic di gjenerazions e epochis diferentis. Il program al tache martars ai 8 te glesie di Sante Marie di Udin cul conciert de Orchestre Sinfoniche Inclusive dal progjet AMI cui Filarmonici Friulani. Ai 18 di Lui il festival al va fûr de citât, tal Vigne Museum di Rosacis in comun di Manzan, par un conciert di sunôrs antîcs e contemporanis fat di Michel Godard e Pasquale Mirra. Altris concierts lontan di Udin a saran a Triest (JM Jazz World Orchestra, il tercet di Alessio Zoratto cul ospit Francesco Bearzatti) e a Reane (EU New Gen 5et. A Udin si scoltarà jazz ma soredut alc di diferent: dal viaç acustic ispirât a Pierre Boulez al omaç dal pianist Enrico Pieranunzi aes musichis dal Sîscent, des visions pitorichis di Musorgskij presentadis di Michele Campanella e Javier Girotto al omaç al compositôr gjaponês Ryuichi Sakamoto par cure di Davide Tura e lis danzadoris di ArteDanza, che al siere la rassegne ai 26 di Setembar. (A.I.) – 07.07.2025