Al è un festival di nivel, rivât aromai ae trentesime cuarte edizion, un dai plui preseâts in Italie e chel plui dongje ae culture e ae sensibilitât di un lûc che al rapresente ancje un ideâl: la “Mitteleurope”. Tal stes timp, di cualchi an e je ancje une rassegne “par dute la famee”, cence fâ di mancul dai temis plui pençs, dai spetacui che a van insot tai problemis dal dì di vuê e chei di un passât che nol à ancjemò vuarît lis feridis, soredut chês des vueris, dai confins… Il “Mittelfest” che si vierç vinars ai 18 a Cividât e che al larà indevant fint ai 27 di Lui cun 29 propuestis di 15 paîs diferents al à un teme che al lee ducj i spetacui e i apontaments: i “tabù” sielts dal diretôr artistic Giacomo Pedini, cuntun scandai par viodi il confin dal just cul sbaliât, di ce che si pues e chel che al è vietât, e vie indevant. Soredut, il “festival par ducj” al è stât pensât par fa vivi i spetacui in dute la citât, tant che un gran palc là che la art, lis emozions e la condivision a son al centri, buinis par ducj, grancj e piçui. In place Domo, tal gnûf tendon tal ort des Ursulinis e in altris lûcs di Cividât, la musiche, il teatri, la danze e il circ a ufriran storiis lizeris: par esempli, la “Cartoon night” de serade di scree, cu la vôs di Tosca e la Fvg Orchestra, ma ancje “Banda Storta Circus”. E daurman, atôrs e autôrs di nivel internazionâl e musiche dal vîf: par esempli, chê dal pianist di liende Ivo Pogorelich. Ma ancje storiis penzis di vuere contade de prime linie, riflessions sui conflits di vuê e dal passât e incrosaments di musiche famose – “La sonata Kreutzer” di Beethoven – cun grancj musicist e un atôr innomenât: i Solisti di Pavia, la violiniste Laura Marzadori, Gioele Dix… (A.I.) – 17.07.2027
Foto Munari
