Marcorè a teatri, il plui grant investigadôr

Un event impuartant pal public dal Teatri “Verdi” di Pordenon: di miercus ai 3 fint a vinars ai 5 e rive une anteprime regjonâl di “Sherlock Holmes – Il musical”, il spetacul cun Neri Marcorè che al fâs l’investigadôr plui cognossût di ducj i timps. Une gnove sfide artistiche pal atôr e condutôr, protagonist dal so prin musical, al centri di une aventure teatrâl plene di misteri, azion e umorisim, cun colps di teatri, enigmis di risolvi e un grup di grancj atôrs. Il musical al puarte il public tal cûr de Londre vitoriane dal diesim novesim secul, une storie scure e apassionante dal conflit che al è simpri stât jenfri il ben e il mâl. (A.I.) – 03.12.2025