“Marcho”: al cine l’ultin puartebandiere dal Patriarcjât

Chê in program tal cine Visionario di Udin ai 3 di Avrîl, a tacâ des 7.30 sot sere, e sarà une grande serade event. In ocasion de Fieste de Patrie dal Friûl, che si celebre propit in chê date, si fasarà la proiezion speciâl di “Marcho. L’ultima bandiera” – prime te version par furlan e aes 9.30 in chê par talian – insiorade dal intervent di Franco Cardini, un dai plui impuartants storics medievaliscj talians, cognossût dal public televisîf e innomenât sagjist, che al à prestât la sô vôs pai aprofondiments dal docufilm coprodusût de ARLeF – Agjenzie regjonâl pe lenghe furlane e Artevideo, cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie. Il docufilm dal regjist Marco Fabbro, lât in onde su Rai Storia, in prime serade, dentri de trasmission “5000 anni e più. La lunga storia dell’umanità”, al à vût daurman un grant sucès. Il stes Giorgio Zanchini, condutôr de trasmission, lu à definît une ocasion straordenarie par scuvierzi aspiets pôc cognossûts de storie dal Friûl che si è incrosade cun events europeans impuartants. La storie contade e je chê di Marc di Murùs, l’ultin puartebandiere dal Stât patriarcjâl di Aquilee, l’unic nobil che i à fat cuintri ae invasion di Vignesie, tor dal 1420. Un avigniment che al è restât platât par 500 agns e che al è vignût fûr dome tal 1986, intant di un restaur, midiant di une letare cjatade tra lis pagjinis di un libri, conservât te biblioteche de residence fortificade Brunelde, a Feagne. (A.I.) – 02.04.2025