Marc di Morùs ancje al Cinemazero

A “Cinemazero” martars ai 22 al sarà proietât il docufilm “Marcho. La ultime bandiere”, il cine documentari di Marco Fabbro (ospit in sale) che al ricostruìs lis vicendis dal nobil Marcho, siôr di Morùs, l’ultin puartebandiere dal Patriarcjât di Aquilee, che si è oponût ae Republiche di Vignesie. La storie si disnode dal 1335, cuant che il patriarcje Beltram al consegne la bandiere dal Patriarcjât a Fidrì, il nono di Marcho, e il 1421, cuant che il dôs di Vignesie al fâs assediâ il cjistiel di Morùs. La vicende e je tornade ae lûs dome intal 1986 in graciis di une letare, conservade tra lis pagjinis di un libri inte biblioteche de cjasefuarte “La Brunelde” di Feagne. Il cine al è stât zirât in vot localitâts dal Friûl cun plui di 200 personis tiradis dentri de realizazion. (A.I.) – 22.04.2025