Une bulimiche, une che e mangje in maniere compulsive, une fantate sigure di se e une masse secje in mût cronic. Cuatri personaçs sul palc, adun cuntun frigo, a straviin e a puartin il public intun dialic a plui vôs ator dai cuarps in sene, tal public e inte vite vere. “Piena come un uovo” (Plene tant che un ûf) al trate il teme dai disordins alimentârs in maniere ironiche e iriverente. Il spetacul, produsût de compagnie Caterpillar, al sarà presentât par trê seradis tal circuit dal ERT: joibe ai 4 tal Teatri “Clabassi” di Sedean, vinars ai 5 tal “Lavaroni” di Dartigne e sabide ai 6 tal auditorium di Çopule, che al torne a vierzi al public dopo lis rinovazions. Il spetacul al esorcize la nestre relazion cul mangjâ: une relazion instabile, cualchi volte tossiche, jenfri amôr e asse, midiant lis storiis di cuatri feminis metudis dongje par piturâ un cuadri un tic di ridi de matetât di chest mont. (A.I.) – 03.12.2025
Foto di F. Rubino
