Lodo Guenzi al torne te Academie “Pepe” a Udin

Tai “Spazis Creatîfs” de “Nico Pepe”, la academie civiche des arts dramatichis di Udin,si davuelç joibe ai 28 aes 6 e mieze di dopomisdì un incuintri speciâl cun Lodo Guenzi, par fevelâ di “cemût deventâ cui che tu sês, falant in ogni tentatîf di jessi cualsisei altri.” Lodo Guenzi, cjantant e frontman di Lo Stato Sociale, il grup di Bologne che al à concuistât il public dal teatri Ariston intal 2018, rivant secont a” Sanremo” cun “Una vita in vacanza”, al è prin di dut un atôr.  Laureât propit te Academie “Nico Pepe” a Udin, al à lavorât par agnorums tal teatri e al à sclarît plui voltis che recitâ al è la sô profession principâl. Di pôc timp, al à lavorât ancje intun cine cun Pupi Avati e prest al sarà protagonist di une serie televisive cul stes regjist e inte cuinte stagjon di “Imma Tataranni” sul piçul schermi, daspò di jessi stât ancje te jurie di “X Factor”. (A.I.) – 27.05.2026