Lis zornadis dal Arlechin e des mascaris dal teatri

E tache a Pordenon la rassegne di teatri internazionâl “L’Arlecchino errante”, inmaneade de Scuele sperimentâl dal atôr nassude tal 1987 e direte di Ferruccio Merisi par puartâ indevant une sorte di “gnove” Comedie de art pensade pai timps di vuê. La rassegne tal non de mascare plui innomenade e rive chest an ae trentesime edizion e la sielte dal teme “sunôrs e sintiments” e vûl proponi une meditazion fonde ator de comunicazion e i siei aspiets. Il program al previôt ogni dì un laboratori cu lis compagniis invidadis, un spetacul di buinore tal centri e un sot sere. Si tache martars al prin cun “Mask Sabbath – sogni comici selvaggi” de compagnie “di cjase” Hellequin: un progjet origjinâl metût dongje cu la poie de Regjon par tornâ a inventâ lis mascaris de “Comedie de art” in maniere contemporanie e tacâ a vierzi la puarte pai events de capitâl de culture 2027. I events in program a son une schirie: domenie 6 e sarà la zornade dal premi “La Stella de L’Arlecchino Errante”, che al celebre trê grancj “artesans dal teatri”, l’indian Kalamandalam John pe tradizion, la taliane Michela Lucenti e l’ucrain Liubov Cherepakhina pe inovazion. (A.I.) – 01.09.2026