Di cinc agns, Mittelyoung al dâ une gruesse man ai artiscj de Mitteleurope sot dai 30 agns che a rivin a Cividât un pâr di mês prime dal Mittelfest. Di joibe ai 15 e fint a domenie ai 18 a saran presentâts nûf spetacui di teatri, danze, musiche e circ, in sene par contâ i “tabù”, ven a stâi il teme sielt dal diretôr artistic dai doi festival, Giacomo Pedini. I spetacui a son stâts selezionâts di 182 candidaturis di dute Europe, di passe 20 Paîs, cul supuart dal Mittelfest: si tache joibe ai 15 cuntun spetacul di danze, “Solitario”, proponût dal coletîf HUM, e po dopo Sorvina Live Concert, cun peraulis e musiche di Sorvina Carr, une artiste americane che e je a stâ a Berlin. Ducj i spetacui si fasaran te Glesie di S. Marie dai Batûts di Cividât. (A.I.) – 14.05.2025
Foto di N. Massella
