La Zornade Internazionâl dal Jazz di Monfalcon a Polcenic

La Zornade Internazionâl dal Jazz e je une celebrazion globâl fondade de UNESCO tal 2011, che si ten ogni an ai 30 di Avrîl par celebrâ il jazz tant che strument pe pâs, il dialic interculturâl, la libertât e la cooperazion jenfri i popui. Creade dal pianist Herbie Hancock, la zornade e cjape dentri passe 190 Paîs cun concierts, events educatîfs e jam sessions. Monfalcon e celebre l’event tal teatri comunâl, joibe ai 30 aes 8:45 sot sere, cul cuartet vuidât dal baterist Peter Erskine, une icone dal jazz globâl, in mût particolâr ai timps dai mitics Weather Report. Di chê altre bande dal Friûl, in spiete de scree de mostre “Miles Davis 100 – Listen to this!” che e vierç a Pordenon ai 8 di Mai, “Jazzinsieme” al ufrìs une anteprime dal event, cun musiche e peraulis, joibe ai 30 aes 9 sot sere tal Teatri Comunâl di Polcenic. Il spetacul “Bitches Brew – Gjenesi de opare mostre di Miles Davis” al viôt Enrico Merlin (vôs e ghitare) sul palc di sene par meti dongje une serade che no je ni une conference ni un conciert, compagnât di Rob Daz ae trombe. (A.I.) – 29.04.2026