E je cressude cu la musiche e la musiche e je deventade la sô vite, ancje se par pandile miôr e à sielt la Americhe, là che e je lade a vivi di passe dîs agns, studiant te prestigjose Universitât di Berkley e lavorant te suaze de musiche jazz, la classiche e chê di avanvuardie. Tal 2023, la violiniste Ludovica Burtone e veve za publicât il so prin album “american”, che al contave il viaç de Italie ae Americhe: “Sparks”. Te prime part di chest an al à jessût “Immigrant tales”, scrit pensant aes storiis di feminis migrantis, viodût di New York, ma pensant a dutis chês che a àn olsât là lontan par cirî alc di miôr. Il disc, che al è jentrât ancje te prime selezion pai innomenâts “Gramny Awards”, al è stât fat in Americhe cun musiciscj di la jù, e daspò de presentazion uficiâl a New York e dulintor, al rive ancje te vecje cjase di Ludovica, il Friûl. Vinars ai 24 e sarà li di Caucigh, a Udin, e domenie ai 26 tal auditorium di Prât par presentâ dal vîf il disc, cuntun pâr di sunadôrs di chenti – Alessandro Turchet e Luca Colussi – e il ghitarist american Max Light. Sabide ai 25, invezit, e sarà tal teatri “Verdi” di Gurize par cjapâ il premi internazionâl di “Percoto Canta”, il festival pai cjantants di dure Italie, inmaneât di 38 edizions, che ogni an al dâ un ricognossiment ai citadins talians che a son a stâ tal forest, in colaborazion cul ent “Friuli nel Mondo”. (A.I.) – 23.10.2025
Foto di S. Di Natale
