La storie di trê zovins “di bessôi” intun documentari

Firmât dal regjist furlan Marco D’Agostini e prodot de cooperative Snait, il documentari “Mai soli” (Mai di bessôi) al conte la storie di trê zovins cun disabilitât che a van a vivi di bessôi in graciis di un progjet metût adun de bande des fameis dai zovins in colaborazion cul centri “Ernesto Balducci” di Çuian e il CSRE “La Terza Via” de Aziende sanitarie universitarie dal Friûl di Mieç. Un progjet che al à nassût di une idee di pre Pierluigi Di Piazza, che al crodeve propit te fuarce che e nas di une rêt di colaborazions. Martars ai 11, il documentari al sarà presentât aes 7 sot sere tal “Visionario” di Udin daspò de introduzion dal regjist e po dopo al sarà fat un dialic cun cualchi espert, a tacâ dal president dal centri “Balducci”, pre Paolo Iannaccone. (A.I.) – 10.11.2025