“Tragùdia – Il canto di Edipo, il lavôr dal regjist visionari Alessandro Serra, al vierç martars ai 30 di Setembar il cartelon 2025/2026 dal circuit dal ERT regjonâl. Il spetacul, premiât al festival internazionâl di Sarajevo, al va in sene – pe prime volte te storie dal ent regjonâl teatrâl – di là dal confin, tal Teatri Nazionâl Sloven di Gnove Gurize., e al rapresente ancje la anteprime di “Lenghis”, il festival dal teatri tes lenghis minoritariis, che si davuelç a Gurize ai 23 di Otubar par là indevant fint al prin di Novembar. Inmaneât dal Teatri Stabil Furlan, che adun cun Regjon, PromoTurismo, Ert dal F-Vj e Comun di Udin, cu la colaborazion de Arlef e de Filologjiche, che e à ufiert la sede operative gurizane, Cjase Ascoli, il festival al è in program 18 spetacui, cun vot compagniis teatrâls e passe trente artiscj che a rivin di cinc Paîs de Europe: Italie, Slovenie, Cravuazie e Spagne. Siet, invezit, lis lenghis che a saran dopradis sul palc: furlan, sart, frison, catalan, albanês, ma ancje sloven e talian, che a son ‘minorance linguistiche’ in Italie e in Cravuazie. Dongje dai spetacui, trê laboratoris cun mestris internazionâi e 16 incuintris di aprofondiment ator lis esperiencis di sene e la traduzion, vierts a dut il public. “Tragùdia”,. Sielt dal diretôr artistic Massimo Somaglino, al è invezit in lenghe grecaniche; ai 16 di Otubar al sarà il TNS a puartâ a Udin “Alla ricerca della lingua perduta”, la seconde anteprime dal festival. (A.I.) – 29.09.2025
Foto di A. Serra
