La Sinfoniche regjonâl e sune i tocs dai zovins students

Si intitule“Suoni d’oggi. Musiche per il nostro tempo” (Sunôrs di vuê, Musichis pal nestri timp) il conciert di martars ai 30 di Setembar aes 8.30 sot sere tal teatri “Modena” di Palme. Sul palc la Fvg Orchestra direte di Marco Attura pal ultin apontament dal “Composition Masterclass” dal Alpe Adria Music Institute, il progjet di formazion alte di musiciscj zovins, che al propon a compositôrs, pianiscj e diretôrs di orchestre dal avignî un percors di perfezionament cun grancj insegnants, lavorant propit cu la orchestre sinfoniche regjonâl. Il program al previôt sîs tocs, ducj presentats in prime assolude, scrits dai students de masterclass (Tiziano De Felice, Michael Fioretti, Daniele Delogu, Riccardo Perugini, Gianluca Piombo e Lorenzo Sorg), dongje di un di Cristian Carrara, mestri resident de Masterclass e un di Carlo Boccadoro, mestri ospit adun cun Richard Danielpour. (A.I.) – 29.09.2025