La passion di Pasolini par Bach

Dopo une Istât plene di musiche, il viaç di “Armonie in Città” si siere martars ai 20 inte Glesie di Sant Antoni, intal cuartîr dai Riçs a Udin. “Pasolini e le musiche di Bach” al è il titul dal conciert, che al scomence aes 9 di sere, dedicât ae passion dal inteletuâl di Cjasarse pe musiche classiche, soredut par chê di Johann Sebastian Bach. Inte produzion di Pasolini, la musiche e à simpri ornât lis pagjinis de narative, i percors poetics e, soredut, il so cine. Protagoniste de serade e sarà la Academie di Arcs “Arrigoni” cu la violiniste Elisa Spremulli e Erika Rampin al oboe, direts di Domenico Mason, par un program dut dedicât a Bach. (A.I.) – 19.09.2022