La orchestre dai zovins di Abbado e je za a Pordenon

Cun 120 musiciscj di dute Europe, dai 18 ai 26 agns, e je di gnûf di cjase al Teatri “Verdi” di Pordenon pal otâf an un daûr chel altri la plui famose e celebrade orchestre zovine tal mont: la Gustav Mahler Jugendorchester, che e selezione i miôrs zovins musiciscj europeans. Un progjet di alte formazion musicâl che chest an al doplee: di là dal mês di Avost, la Orchestre fondade di Claudio Abbado e je za cumò a Pordenon, dulà che e restarà fint a vinars ai 19 di Mai pal grant conciert sot de vuide di une des bachetis principâls dal panorame mondiâl, Daniele Gatti. La Orchestre e sarà compagnade inte sô preparazion di undis tutôrs e e fasarà lis provis dentri dal Teatro Verdi, te Biblioteche Civiche, intal Ex Convent di S. Francesc e in altris lûcs. (A.I.) – 11.05.2023