La “Nico Pepe” e impie il fûc de passion

Ancje chest an, tal plen dal Istât, la civiche academie de art dramatiche “Nico Pepe” di Udin e propon il “SAFest – Summer Academy Festival”: une rassegne internazionâl par scuelis di teatri, che si vierç al confront e al scambi cun realtâts e artiscj di dut il mont. Un dialic di une scuele a chê altre, che al stice ancje il teritori in graciis dai spetacui cui zovins talents che a rivin achì par ogni gnove edizion, ancje midiant sessions viertis al public. “Il fuoco della passione”, il fûc de passion, al è il teme de academie di Istât, vierte di martars ai 16 a sabide ai 20 di Lui, te suaze dal calendari di events de “Nico Pepe International”. A screâ il festival, il spetacul “Niente come sembra” dai parons di cjase de “Nico Pepe” par cure dal diretôr Claudio de Maglio. Il dì dopo al sarà la volte di “Parati” de spagnole Higher School of Performing Arts of Galicia e di “Macbeth Solo”, diret e interpretât dal inglês Paul Goodwin. (A.I.) – 15.07.2024