La “Nico Pepe” e conte il Pasolini rivoluzionari

Ai 2 di Novembar, la Civiche academie di art dramatiche “Nico Pepe” di Udin e presente tal Teatri gnûf “Giovanni da Udine” (e in repliche al 4 tal “Pasolini” di Çarvignan e ai 5 tal “Rossetti” di Trieste) il spetacul “Nel cuore della realtà. Pasolini: vita e letteratura che si fanno cinema” (Tal cûr de realtât. Pasolini: vite e leterature che a deventin cine), cui arlêfs che a son daûr a diplomâsi e chei dal secont an. A cincuante agns de muart dal poete di Cjasarse, al è un viaç tal percors di un inteletuâl che al ven fûr – ancjemò une volte – tant che une figure provocatorie, visionarie: un profete che al scosse lis cussiencis. “Il fin – al sclarìs il regjist Claudio de Maglio- al è chel di spiegâ ben ai zovins e a ducj trop grant e cetant visionari al jere chest poete discomut, ma ancje regjist rivoluzionari, e fasint cussì o sperin di stiçâ la curiositât e la riflession”. (A.I.) – 31.10.2025