La “Nico Pepe” ancjemò une volte invidade in Maroc

La Civiche academie de art dramatiche “Nico Pepe” e je stade invidade ancjemò une volte al FITUC, il festival internazionâl dal teatri universitari, a Casablanca in Maroc. Vinars ai 11 tal gran teatri “Ben M’Sik” e presentarà “Le magnifiche storie per restare vivi / Les histoires magnifiques pour rester en vie”, regjie e dramaturgjie di Claudio de Maglio, cui arlêfs dal tierç an. Une conferme de vocazion internazionâl de scuele, stant che la rassegne, rivade ae trentesime setime edizion, e je un event di presi e, daûr dal teme sielt pal 2025, e fâs deventâ il teatri un strument de diplomazie culturâl. La “Nico Pepe” è sarà protagoniste ancje de scree, joibe ai 10, cun cualchi sene dal spetacul “Niente come sembra”, e il diretôr Claudio de Maglio al fasarà un laboratori dedicât ae Comedie de art intune rassegne là che si cjatin compagniis, students, docents e professioniscj di ogni cjanton dal Mont. (A.I.) – 09.07.2025