La musiche e torne tal “Margherita” di Tarcint

Fint ai agns Nonante, al è stât un dai lûcs centrâi de musiche dal vîf, no dome pal teritori. Sierât par cualchi an, dal 2021 la storiche “Sala Margherita” di Tarcint e je tornade a vierzi e a dâ acet a cualchi iniziative, dentri di un edifici di presi, tirât su dai agns Cuarante e Cincuante daur di un progjet dai architets Provino e Gino Valle. Cumò si son metûts adun in tancj, pardabon, par tornâ a meti al centri il “Margherita”: la associazion In Stella soredut, ma ancje il Consei regjonâl, il Comun di Tarcint, la Opera Pia Cojaniz, la academie musicâl Naonis di Pordenon, par inmaneâ la prime edizion dal “Margherita Music Club”. Il fin al è chel di puartâ la musiche di autôr e di cualitât dentri di un lûc pardabon storic, che vie pai agns al à dât acet a cjantautôrs e musiciscj rock e jazz. Lis primis ‘cercis’ a rivaran cuntun pâr di concierts sielts dal diretôr artistic dal “Margherita Music Club”, il musicist osovan U.T. Gandhi. Joibe ai 10 di Lui al sarà sul palc dal ‘gnûf’ Margherita cul Organ Madness Trio di Daniele D’Agaro (che al celebre 30 agns di ativitât) e ai 21 cuntun grup a pene nassût, Ttio Intercontinentale. (A.I.) – 09.07.2025