La liende de musiche africane intune produzion furlane

Daspò dal sucès di “My Name is Nina”, ancjemò ator pai teatris di dute la regjon, Euritmica e torne cuntune gnove produzion, cheste volte dedicade a Miriam Makeba, une figure emblematiche dal vincjesim secul. Une liende de musiche e de vôs te culture e tai lengaçs dal Sud Afriche. Un simbul di emancipazion, di lote e di liberazion in cetancj paîs e in dut il continent, cognossude cul non di “Mama Africa” no dome pal so impegn, ma ancje pal calôr e l’afiet che e veve pe sô int. Il spetacul “Makeba” al debute martars ai 3 tal Teatri “Pasolini” di Çarvignan e il dì dopo tal Teatri “San Gjorgio” di Udin te suaze de rassegne “Note Nove”. Al centri di cheste gnove produzion al è Valerio Marchi che, compagn di chês altris produzions scritis e puartadis sul palc tai ultins agns, al conte la storie umane e artistiche di Mama Africa, leade a strent cu lis cjançons plui innomenadis dal repertori de Makeba, rangjadis e interpretadis de cjantante Nicoletta Taricani e dal grup di musiciscj jazz ecezionâi de sene jazz di chenti: Alfonso Deidda, Giulio Scaramella, Alessio Zoratto e Luca Colussi. (A.I.) – 02.03.2026