La fieste in cjistiel pai cent agns di Miles Davis

Daspò dal sucès dai prins events, il festival “Udin&Jazz” al va indevant miercus ai 15 cuntune des seradis plui spietadis de trentesime seste edizion. Marcus Miller, une vere liende dal jazz contemporani, al sarà sul palc di sene te Piace dal Cjistiel aes 9 e mieze sot sere par tacâ propit di Udin cu la prime di cinc datis il tour talian di “We Want Miles!”, un progjet dedicât ai cent agns de nassite di Miles Davis. Bassist, compositôr, produtôr, vincidôr di cinc premis Grammy e ambassadôr pe pâs de UNESCO, Marcus Miller al è stât un dai colaboradôrs plui strents di Miles Davis, e adun i doi a àn scrit cualchi cjapitul fondamentâl te storie dal jazz moderni. “We want Miles!” al è un viaç tal univiers creatîf di Davis, cu la presince cualchi grant musicist: Mike Stern, Bill Evans, Mino Cinelu… La zornade e tache aes 7 di dopomisdì tal curtîl di Palaç Morpurgo cun “The Last Coat of Pink , un progjet une vore fin dal tercet jazz Danilo Gallo par celebrâ i sessante agns de nassite uficiâl dai Pink Floyd. (A.I.) – 14.07.2026