La fieste dal cine furlan li dal Visionario

Il cine furlan al torne sul grant schermi par un dì cun “InCuintriLûs”, la prime mostre dute dedicate aes produzions audiovisivis in marilenghe, vinars ai 28 tal “Visionario” di Udin. Ideât e inmaneât de associazion culturâl Maiè, l’apontament al puarte al centri une produzion cressude tai ultins agns in numars e cualitât. Tredis autôrs, indipendents o no, a presentin oparis che a van dal documentari ae animazion, dal teatri filmât ae fiction ancje pe television. Si tache tal dopomisdì cuntun spazi pes fameis, po dopo cualchi anteprime e visions di autôr: “Mosaics e terass” di Christian Canderan, “l Rinpìn” di Gianpaolo Scognamiglio, “Marcho” di Marco Fabbro, “Int in Vore” di Marco D’Agostini e cualchi toc di produzion dal Teatri Stabil Furlan, cui regjiscj e protagoniscj in sale par dut il dì. Sot sere, cualchi anteprime: “Voltâ Vele” di David Nicoloso, “Natisa” di Stefano Giacomuzzi (che al sarà ancje a “Suns Europe”), “Faliscjis” di Claudio Cescutti, “Lingua Mater” di Massimo Garlatti Costa e il documentari “Dogne une val dapît dal Montâs” di Ivo Pecile e Marco Virgilio. A sierà, il curadôr artistic Giorgio Cantoni cun trê siei gnûfs lavôrs e Dorino Minigutti. (A.I.) – 27.11.2025