La danze tai spazis publics a Davâr

A Davâr, lis stradis e lis piacis, lûcs di incuintri e di relazion, si mudin par un dì intun palc di sene, dulà che la danze e devente un imprest par interpretâ i spazis publics di ogni dì, cu la sô capacitât di meti dongje cuarps, storiis e paisaçs. Al è cun chest spirt che la compagnie AZIONIfuoriPOSTO di Trent e je stade in vore pe ultime part finâl dal progjet in residence artistiche “Davâr storiis olmis materie”, finanziât dal PNRR: un viaç dedicât al leam font dai abitants cui lûcs là che a son a stâ. L’event al segne la conclusion dal viaç artistic e di animazion dal comun di Davâr, fondât su la relazion de int cu lis comunitâts locâls. I cinc artiscj – Francesca Bertolini, Silvia Dezulian, Camilla Isola, Serena Pedrotti e Filippo Porro – a àn scomençât a fâ provis intal Borg di Sôra, par preparâsi al spetacul che a presentaran domenie ai 29 tal viert, tes stradis e intes piacis: “Perspectiva. Vedere attraverso”, che al à za vinçût doi premis nazionâi intal 2020 e intal 2022. (A.I.) – 28.03.2026