La danze jenfri cuarp, mît e paisaç

Une gnove produzion di danze che e met dongje il patrimoni contemporani e chel intangjibil si scree joibe ai 19 aes vot sot sere a Udin, tal Museu Etnografic dal Friûl. “Soglie del Vivente – Phoenix, studio sulla rinascita” (Puartis dal vivent – Fenice – Phoenix, studi ator de rinassite) e je une gnove produzion nassude dal incuintri de balarine Anna Savanelli cul artist Devid Strussiat. Il spetacul al ven fûr tant che un viaç traviers dal cuarp, dal mît e dal paisaç, instreçant lis lenghis de danze contemporanie cun elements dal patrimoni intangjibil dal Friûl-Vignesie Julie. Il lavôr al esplore il mot tant che une puarte buine di riativâ lis olmis fondis de culture rurâl: simbui, mascaris, rituâi e imagjins che a vegnin di une dimension sospindude jenfri il mît e la vite di ogni dì, jenfri il visibil e l’invisibil, che si disvilupin ator dal teme de rinassite, tant che procès di trasformazion e rigjenerazion. Il spetacul al à cjapât forme intune residence artistiche a S. Martin dal Tiliment e e je produsude di Ecopark compagnie di danze Arearea. (A.I.) – 18.03.2026