La Cjargne si zuie un puest ai Oscar

Un cine zirât in regjon, soredut in Cjargne, ma ancje a Triest a sant Vît dal Tiliment, al è inte liste des peliculis che si zuiaran la candidature taliane al Oscar 2023. Al à za vinçût il David di Donatello e al è stât presentât al Festival di Cannes “Piccolo Corpo” di Laura Samani, cun protagoniste la furlane Celeste Cescutti, fat de cjase di produzion Nefertiti. Ispirât a une tradizion de mont furlane sui fruts muarts prime dal batisim e ‘ripuartâts in vite’, al è intune selezion di 12 cines. Lunis ai 26, da cheste liste, e sarà individuade la opare par rapresentâ il nestri Paîs inte fase di selezion pal miôr cine internazionâl. Pes veris candidaturis, invezit, al bisugnarà spietâ Zenâr 2023. (A.I.) – 22.09.2022