La ATF e cîr gnûfs tescj pal teatri furlan

La Associazion Teatrâl Furlane Aps di passe cuarante agns e opere al fin di valorizâ il teatri furlan, la culture e la lenghe furlanis. Cun di plui e je impegnade a stiçâ la scriture di tescj teatrâi origjinai in lenghe furlane. Il repertori des compagniis associadis, di fat, al è mudat vie pal timp: tai prins agns dal Nûfcent a jerin preseadis lis comediis semplicis, legris, ma bielzà intal 1923 la Societât Filologjiche Furlane e veve inmaneât un prin concors di tescj in lenghe furlane. Daspò di une lungje polse par vie de seconde vuere mondiâl, dai agns ’70 e je tornade a tacâ une ativitât vivarose des compagniis, simpri fondade su entusiasim e passion dai atôrs amatoriâi, cun cetantis rassegnis organizadis. A pet dai autôrs furlans classics, i repertoris des compagniis di vuê a àn miôr doprâ traduzions dai classics, di comediis di vuê in lenghe taliane o pûr chês forestis di sucès. Di chi e nas la esigjence de bande de ATF Aps di sticâ ducj i apassionâts a scrivi pal teatri furlan e a proponi une proprie storie origjinâl pe sene. Ancje te decime cuarte edizion dal concors, la Associazion e à decidût di favorî cui che al à une biele idee, ma nol rive a componi un copion intîr, o pûr al à pôre di frontâ la scriture in marilenghe. Simpri sul gjenar “comedie” si pues mandâ ancje un “monolic” o un “test curt”, par podê misurâsi ancje cu le costruzion di tescj curts. Par di plui chest an, in ocasion dal cincuantesim aniversari dal taramot, e ven propueste une racuelte di “contis par no dismenteâ”, contis curtis ancje di fantasie che a fasin riferiment ae esperience dal 6 di Mai dal 1976, ce impat che al à vût, ce ricuarts che al à lassât, cualis sperancis, sedi vivût di dentri che di lontan. Simpri cuntun voli ae formazion, par chei che si iscrivin a son stâts organizâts cors cun partecipazion cence sore nuie: tal mês di Mai un prin cors “Peraulis in sene” sul svicinament ae sene tacant di un copion teatrâl e un secont in rêt in Setembar di scriture creative, “Scrîf! Scrîf! Scrîf!”. Ducj i doi cors a son tignûts de associazion Servi di Scena-Matearium, che a saran ancje l riferiment par esigjencis di dramaturgjie intant che la corezion de grafie e sarà curade de Filologjiche. Sul sît internet de ATF si pues notâsi par une o plui iniziativis lassant i riferiments par jessi inzornâts su la iniziative. Daspò de edizion passade, che e veve viodût rivâ ben 23 copions, cuatri di chei bielzà lâts in sene, si spietisi cetantis altris comediis brilantis a teme libar, monolics o curts teatrâi. Il judizi finâl al sarà dât propit de bande des compagniis amatoriâls associadis ae ATF, par favorî la metude in sene. Pai tascj inviâts ae selezion pe contis “No Smenteâ”, invezit, si proviôt la publicazion di une racuelte specifiche par leturis senichis a ricuart e celebrazion dal aniversari. Regolament e iscrizions in rêt, sul sît de Associazion Teatrâl Furlane o scrivint a: biblioteca@associazioneteatralefriulana.com. (A.I.) – 25.03.2026