Al rive tal Teatri gnûf “Giovanni da Udine”, di miercus ai 12 fint a vinars ai 14 di Març, “Il fu Mattia Pascal”, spetacul gjavât fûr dal romanç di Luigi Pirandello, cun Geppy Gleijeses intal rûl dal titul e la regjie di Marco Tullio Giordana. Incjastrât intune esistence grise e cence sintiments, par une schirie di cumbinazions, Mattia Pascal al romp in maniere definitive cul passât e al devente une altre persone. Publicât intal 1904, “Il fu Mattia Pascal” e je une “farse trassendentâl” tignude sù dal assurt, dulà che al ven sù dute la contradizion jenfri jessi e aparî. Il romanç e la sô trasposizion su lis senis a puartin ae ribalte cetancj temis de produzion leterarie e teatrâl di Pirandello: la vision pessimistiche dal mont, la imagjin dal om contemporani in ecuilibri jenfri realtât e finzion, la contradizion tra ce che o sin par chei altris e ce che o sin pardabon. (A.I.) – 11.03.2025
Foto di M. Prati
