Israel e Palestine sul palc di sene

A son mots che in timps di pâs a somein sempliçs, ma cuant che la realtât e je dominade di un conflit fuart e cence soluzion, a deventin eroics. “Salam/Shalom. Doi paris”, gjavâtfûr dal romanç straordenari “Apeirogon” di Colum McCann – vincidôr dal Premi “Tiziano Terzani” dal 2022 – al è il titul dal spetacul in program par martars ai 21 sul palc di sene dal Teatri “Verdi” a Pordenon. Prodot dal CSS, Teatri stabil di inovazion dal Friûl-Vignesie Julie e dal Festival “Vicino/Lontano-Premio Terzani”, plui che une rapresentazion teatrâl, e je une testemoneance necessarie di un dai conflits plui dolorôs dal nestri timp. Intal adatament di Paola Fresa, Massimo Somaglino e Alessandro Lussiana a puartin in sul palc di sene l’ israelian Rami e il palestinês Bassam: doi oms e paris segnâts pardabon dal stes dolôr che no si pues concepî, la pierdite des lôr fiis, ognidune copâde de violence de altre bande. Ma al è propit di chel dolôr, di chê feride, che e nas la pussibilitât di un incuintri. (A.I.) – 20.04.2026