Une pièce intense e delicade. Si conte de vite, dal timp che al passe e infin de muart. Il Teatri Stabil Furlan al presentarà tal Palamostre di Udin, sabide ai 17 di Fevrâr, aes 8.45 sot sere, “Dopo la pioggia / Dopo de ploie”, di e cun Aida Talliente e Chiara Benedetti. Tal palc si alternin ironie fine e emozion profonde, insuazadis des lûs di Luigi Biondi, des fotografiis di Danilo De Marco e dai elements senics di Federica Rigon cu la direzion tecniche di Iacopo Candela. La produzion e je di “ariaTeatro” cu la colaborazion di “Fattore K.”.
“Dopo la pioggia / Dopo de ploie” e je la storie di dôs feminis, dôs sûrs di Udin, che a frecuentavin dispès il centri de citât. Al jere deventât normâl viodilis a cjaminâ sot il braç, triculant une dongje di chê altre. Si voltavisi simpri a cjalâlis, cun tenarece, curiositât e maravee. Ae fin, a cjaminâ pes stradis de citât e jere restade dome une. Ma par pôc: une dì no si le à viodude plui. Chest spetacul, che al riflet su la tenarece, la complicitât, il stâsi dongje, il slontanâsi, al è nassût dal ricuart di chês dôs feminis, cussients che il spazi dal teatri al è adat par disvilupâ un pinsîr su la relazion, la vite e la muart. La conte e tache de fin, ven a stâi de muart di une des dôs sûrs, intune cjase, la lôr, une buinore che al ploveve – chest al sarà il fonts emotîf de storie. Di chel moment li, si torne indaûr tal timp, come intun sium. «La storie di chestis dôs sûrs di Udin e je dome un pont di partence par contâ di un afiet, di dôs animis che si vuelin ben, che a traviersin la vite insiemi – e spieghe Aida Talliente -. Duncje, e je une storie ordenarie, fate di robis piçulis. Par me e je stade une necessitât. O sin partidis di une robe semplice e o vin sgjavât, cun poesie e delicatece, tal percors de vite, in chest câs, de vite di chestis dôs feminis. Cjapant l’esempli dal cine mut dai agns Vincj, che al è cence peraulis, lizêr, cheste storie e fâs ridi, pensâ, comovi. E je un viaç piçul, no à peraulis, ma ben azions che a fevelin une vore», e à dit la atore che e à a pene finît di recitâ chest spetacul in Trentin e a Rome, e che dopo di Udin lu puartarà ancje a Napoli.
Dutis lis informazions su spetacui, biliets e abonaments a son sul sît www.teatristabilfurlan.it (info@teatristabilfurlan.it, 392 3273719). La bilietarie e je tal CSS Teatri Palamostre (di lunis a sabide, des 5.30 dopomisdì aes 7.30 sore sere. Informazions: 0432 50692; biglietteria@cssudine.it), e tes sedis dai spetacui, une ore prin che a tachedin.
I inzornaments e dutis lis novitâts si cjatin ancje su lis pagjinis Facebook e Instagram dal Teatri Stabil Furlan. (a.d.g.) – 13.02.2024
