Intun mês i concierts di un an

Al è simpri sucedût, ma mai cussì e cui numars di chest an. Al rive l’Istât e i concierts si moltiplichin par rivâ a numars che tes altris stagjons no si puedin nancje insumiâsi! Za un pâr di mês indaûr, cuant che i programs no jerin ducj pronts, si podeve contâ almancul un centenâr di apontaments dome tal mês di Lui, che come simpri al è il plui siôr di apontaments tal viert: chei che a garantissin i numars plui grancj, almancul su la cjarte. Il numar al è cressût cence fin e, tignint cont no dome dai nons plui grancj – lis stelis internazionâls e talianis – ma di ducj i concierts di pop, rock, jazz e classiche, il totâl al è fûr di ogni sintiment. In struc, cun almancul 4-5 apontaments ogni dì ator pal Friûl, dal mâr ae mont, dai borcs e i paîs aes capitâls, il numar di concierts inmaneâts tal mês di Lui al va pardabon dongje di ducj chei fats tal rest dal an! E forsit nol covente nancje tirâ dentri il mês di Avost, che pal 2026 al sarà ancjetant cjalt e cjariât di apontaments. LIS RASSEGNIS. Miôr vê la pussibilitât di sielzi che nissune sielte, chest al è sigûr, e cun dute cheste ufierte, ognidun al pus cjatâ l’artist o i artiscj plui preseâts. Tant par scomençâ, tai festival: un di chei, Folkest, al a za vivût lis zornadis plui penzis a S. Denêl. A Tarvis, pe trentesime prime edizion dal “No Borders”, di vinars ai 10 a tachin i concierts tal vert tai lâts di Fusinis di dopomisdì: Elvis Costello, Manu Chao, Lodovico Einaudi, Coez e altris. LA “CAPITÂL”. Daspò des desenis di miârs di personis pai concierts di Eros Ramazzotti, Vasco Rossi e Zucchero, Udin si conferme capital dai concierts ancje sul plaçâl dal Cjistiel cuntune schirie di artiscj talians e dal forest. E cu lis nûf zornadis di “Udin&Jazz”, cun 2-3 concierts ogni dì in lûcs diferents, di Matteo Mancuso a Baba Sissoko, Nik West, Marcus Miller, Mono Neon… LIS CITÂTS. Ancje a Pordenon la sielte e sarà une vore siore, massime in gracie dal “Blues Festival” cu lis sôs sieltis ecletichis: Goran Bregovic, i Dogstar dal atôr Keanu Reeves, i Subsonica, Yngwie Malmesteen, Skunk Anansie… A Triest invezit, fûr dal tradizionâl festival jazz e di dute la schirie di rassegnis, a saressin di notâsi almancul i Gorillaz, un dai concierts anunziâts za un an prime! MÂR E.. VILE. A Lignan il miôr ancje tai numars al sarà tal mês di Avost daûr tradizion, ma za ai 13 di Lui al rive Jacob Collier “in trasfierte” di Udin&Jazz e po dopo al sarà ancje cualchi non a jentrade libare: Stefano Bollani, Matia Bazar, Bambole di Pezza, intant che di là dal Tiliment, a Bibion, a rivaran Antonello Venditti, Gabbani e Alfa. E Vile Manin? Ancjemò une volte, e jere la vere capitâl de musiche dal vîf tal mês di Lui: se nol jere avonde il non dai Duran Duran, a rivin un daûr di chel altri Modà, Luca Carboni, Pooh, Negramaro e Il Volo. IL REST. O vin forsit pierdût il cont, ma no la conferme che ancje chest an i artiscj talians a son la plui part, une tindince che e va indevant di cualchi an e che e previôt Masini a Rivignan, Nek e Planet Funk a Grau, Elio e le Sorie Tese a Daçan e un tercet di stelis par gjenerazions diferentis a Palme: Giorgia, Blanco, Mannoia. Une volte si saressin dome insumiâts cheste bondance… (A.I.) – 10.07.2027