Il confin jenfri Italie e Slovenie al torne a deventâ un puint di culturis cu la setime edizion dal festival transfrontalîr “Musichis dal Mont/Glasbe sveta,” che e fint ai 8 di Avost al mude Gurize e Gnove Gurize intun unic palc internazionâl, cun undis concierts di jazz, flamenco, folk, eletroniche e sunôrs digjitâi. Inmaneade dal circul culturâl “Controtempo” di Cormons cui slovens di Kud Morgan, la poie des istituzions culturâls di ducj i doi Paîs, di Go!2025 e dal Goriški muzej, la rassegne e je un simbul di colaborazion che al puarte i spetacui in lûcs simbolics di cheste bande e di chê altre dal confin: il parc di palaç Coronini e il Cjistiel di Kromberk. Miercus ai 30 l’ultin conciert di cheste bande dal confin, cul coletîf francês Fülü, che al sune jazz e techno. In Avost i concierts a son ducj in Slovenie: ai 6 il ghitarist Paolo Angeli e il saxofonist Vasko Atanasovski cu la sô “Transbalkanika”, ai 7 Roberto Fonseca, stele cubane e erêt dai Buena Vista social club (daspò dai sarts Tumbarinos di Gavoi) e il dì dopo si siere cul tercet american de pianiste jazz Rachel Z cun ospit il grant Omar Hakim. (A.I.) – 29.07.2025
Foto di L. Pesqué
