Imparâ il teatri (che no si viôt)

Al è un teatri che no si viôt, ma al covente par lâ in sene. Al è chel fat di mans che a lavorin, abilitâts, precision e creativitât: senografs, costumiscj, tecnics de lûs, organizadôrs… Al è par lôr, e pes gnovis gjenerazions che a vuelin scuvierzi chest mont, che al è stât pensât “Mestieri della scena”, mistîrs de sene. Il progjet, metût adun dal Teatro Club di Udin, al torne pe sô cuinte edizion ai 2 di Març, consolidant un model di formazion unic. Diret ai students des scuelis superiôrs e a chei sot dai 35 agns, il percors al è stât creât cuntun obietîf clâr: introdusi lis gnovis gjenerazions aes professions che dispès no si viodin, ma che a son fondamentâls par fâ esisti il teatri. Dongje dai atôrs e dai regjiscj, al è un mont di professioniscj che a àn lis lôr lidrîs intal artesanât, ma che tal dì di vuê a domandin abilitâts multidissiplinârs di gnove gjenerazion. Il program di formazion al cjape dentri une serie di laboratoris tematics che a vuidaran i partecipants ae scuvierte des abilitâts al centri dal spetacul dal vîf: la gjestion dal palc di sene, la senografie, la sartorie, la trucadure, il lusôr e il sunôr. Daspò dai seminaris programâts pal mês di Març, i partecipants a varan la pussibilitât di meti in pratiche ce che a àn imparât judant a meti in sene lis rapresentazions pe cincuantesime cuinte edizion dal Palio Studentesco di Udin, che si davuelzarà de fin di Avrîl ae fin di Mai. (A.I.) – 01.03.2026