Il Teatri Stabil Furlan al torne a puartâ il Poete a Cjasarse

Al Teatri “Pasolini” di Cjasarse, intune serade speciâl fûr abonament, Joibe ai 12 aes 8.45 di sere, al rive “Rosada!”, il spetacul prodot dal Teatri Stabil Furlan in colaborazion cun Arlef – Agjenzie Regjonâl pe Lenghe Furlane e Mittelfest. Nassût da une idee dal coletîf Caraboa Teatri, cu la dramaturgjie e la regjie di Gioia Battista, la interpretazion di Nicola Ciaffoni, il cjant di Elsa Martin, lis musichis di Giulio Ragno Favero e “il contribût in amicizie” di Bruno Pizzul, il spetacul al va ae scuvierte di un Pasolini diferent. Lis sôs “Poesiis a Cjasarse” a son il pont di partence par indagâ il leam tra la peraule e la dibisugne di jessi salvade, e di resonâ sui confins tra tiere e lenghe, mont contadin e leterature. (A.I.) – 10.01.2023