Il rus Sokolov, mestri mondiâl dal piano, al torne tal “Bon”

Tal Teatri “Luigi Bon” di Culugne e torne la magjie musicâl di Grigory Sokolov. Il musicist rus, calcolât un dai pianiscj plui grancj dal nestri timp, al sarà protagonist sabide ai 8 di un dai apontaments cun plui lustri de stagjon 2024/2025 de Fondazion “Luigi Bon”. Chel fra Sokolov, la Fondazion e il so teatri, sielt di passe dîs agns dal artist tant che tape fisse anuâl dal so viaç musicâl, al è aromai un leam indissolubil, che ancje chest an al cjatarà concretizazion intun conciert maraveôs. Tal Teatri “Bon”, Grigory Sokolov al proponarà un program penç cun musichis di William Byrd e Johannes Brahms. (A.I.) – 07.02.2025