Il “Recuie” di Verdi tal program dal “Verdi”

Daspò dal grant sucès dal conciert di scree cun Alexander Lonquich, al va indevant il program di musiche dal teatri “Verdi” di Pordenon cuntun gnûf, straordenari apontament dedicât a une des oparis mestri di simpri: la Messe da Recuie di Giuseppe Verdi. Joibe ai 13 il lavôr sinfonic e corâl dal compositôr al sarà sunât e cjantât de Orchestre e de Corâl Sinfoniche di Milan, diretis di un dai protagoniscj de gnove gjenerazion internazionâl: l’austriac Emmanuel Tjeknavorian, trente agns, di divignince iraniane e armene. A cjantâ un dai moments plui adalt de art di Verdi e di dute le musiche sacre, cuatri vôs di ecezion: Chiara Isotton (sopran), Szilvia Vörös (mieç sopran), Raffaele Abete (tenôr) e Manuel Fuentes (bas). (A.I.) 12.11.2025