Il Pasolini poete metût in musiche di Elsa Martin

La cuarte stagjon di spetacui in marilenghe dal Teatri Stabil Furlan si siere domenie ai 9 di Març cuntun apontament dedicât aes poesiis a Cjasarse di Pier Paolo Pasolini, doprant il lengaç de musiche. Chê dal pianist Stefano Battaglia, che za vincj agns indaûr, tal 2005, al veve fat un dopli disc, “Re: Pasolini” jessût pe innomenade etichete todescje di jazz mondiâl ECM. Cualchi composizion di chês e torne cumò a vivi intun gnûf album fat cu la cjantante furlane Elsa Martin, che tal 2020 e veve za regjistrât l’album “Linguamadre: Il Canzoniere di Pasolini”, jentrant cussì tal mont dal poete. Ducj i doi a vevin ancje fate une antologjie (“Sfueai”, dal 2019), che e je une racuelte des vôs plui poetichis dal Friûl, cjapant dentri ancje Pasolini. “Lyra”, che al sarà presentât pe prime volte tal gnûf teatri “Paolo Maurensig” di Felet, al è il conciert di presentazion dal album cul stes titul, che al ven fûr cualchi dì prime, ai 6 di Març, pe etichete Artesuono dal furlan Stefano Amerio: la “cjase” dai plui famôs jazziscj no dome di chenti, ma di dut il mont. (A.I.) – 08.03.2025