Il Pali dai students al siere cui ospits

Un mês di teatri, emozions e la sale plene di int. Ma soredut, une conferme: il “Palio Teatrale Studentesco Città di Udine”, in plui di jessi il festival teatrâl pai zovins plui vieri in Italie, al continue a jessi un event che al è bon di fevelâ cui zovins. La cincuantesime cuinte edizion, un event storic inmaneât dal Teatro Club Udine, e je daûr a rivâ ae sô serade di sieradure, superant il record di passe 3.000 personis dal an passât. Dai 28 di Avrîl, la storiche “cjase” dal Palio, il teatri “Palamostre” di Udin, al à dât acet a 26 spetacui cu la partecipazion di passe 500 students e zovins sul palc. Daur de tradizion, cumò il Palio si vierç ancje al dialic cun altris realtâts culturâls dal teritori. Domenie ai 24 di Mai, il “Palamostre” al ospitarà Lidi Precari, une compagnie formade dome di atôrs e atoris sot dai 35 agns e vincidore dal “Mittelyoung 2025”, che e presentarà “C19H28O2” di Riccardo Rampazzo. (A.I.) – 23.05.2026