Il Nadâl e il presepi dal Teatro Incerto

Gnove produzion teatrâl pal Teatro Incerto, il grup fondât tal 1982 di Claudio Moretti e Flavia Valoppi, che e je tornade dentri dal tercet, adun cun Elvio Scruzzi, par presentâ “Nadâl – Stupor Mundi”, prodot cul CSS Teatri Stabil di Inovazion dal F-Vj. Za presentât in anteprime a Var, il “presepi teatrâl” dal Incerto al sarà ator pal Friûl dai 20 di Dicembar e fint ai prins dîs di Zenâr: si tache sabide ai 20 a Rigulât, domenie ai 21 a Flaiban, po dopo ai 27 a Morùs, ai 28 a Pucinie, ai 30 a Rivis Darcjan e tal an gnûf, ai 2 di Zenâr a Dignan, ai 3 a Ruvigne e ai 10 a Cordovât. E je la storie di un viaç dai trê atôrs de Cjargne fint a S. Margarite par meti dongje un “presepi vivent” lotant cuintri ducj i pericui, massime chei de burocrazie, par tornâ indaûr a une tradizion plui intime e familiâr. (AI) – 19/12/2025