Il Festival dal teatri zovin de Europe

Nûf spetacui di teatri, danze, musiche e circ a laran in sene inte seste edizion di “Mittelyoung”, il festival par chei sot dai 30 agns inmaneât dal “Mittelfest”, che al dâ un supuart concret ai artiscj zovins sot de Mitteleurope, selezionâts di une jurie ancjetant zovine. L’event si davuelç dai 14 ai 17 di Mai a Cividât, te Glesie di Sante Marie dai Batûts par contâ la “pôre”, il teme sielzût dal diretôr artistic di Mittelfest, Giacomo Pedini, pe trentesime cuinte edizion dal festival, la sô ultime. La pôre e je une emozion che e travierse il nestri timp e, tes mans dai zovins artiscj, si mude in materie vivent, intun teritori di esplorâ, un soiâr di traviersâ. “Mittelyoung” 2026 al ospitarà 9 spetacui sielzûts di 20 esperts sot dai 30 agns, i “curatores”, a tacâ di 238 candidaturis ricevudis di 28 paîs: 2 di teatri, 3 di musiche, 2 di danze e 2 di circ, che a rapresentin 7 nazionalitâts diviersis. (A.I.) – 12.05.2026