La vincjesime setime Stagjon di Prose dal Teatri Gnûf “Giovanni da Udine” e jentre intal vîf, di martars ai 24 a joibe ai 26 di Otubar, cuntun dai dramis plui famôs di Arthur Miller, “Uno sguardo dal ponte”, che al viôt Massimo Popolizio sedi atôr principâl che regjist. Doi agns dopo la sô version di “Furore” di John Steinbeck, Popolizio al fronte ancjemò il grant drame american cu la storie dal amôr insan – che al puarte ae tragjedie – di un portuâl imigrât de Italie che al vîf a Brooklyn cu la femine e la gnece di disevot agns. Dongje des trê recitis, doi incuintris di “Casa Teatro” vierts al public: martars aes 5.30 dopomisdì “Miller, il suo sguardo sul mondo” par cure di Peter Brown, diretôr de British School F-Vj; il dì dopo, Massimo Popolizio e la Compagnie dal spetacul a incuintrin il public. (A.I.) – 23.10.2023
Foto di Y. Kageyama
