Il dolôr par pre Beline… e Oscar Wilde

Miercus ai 18, tal Teatri S. Zorç di Udin, al larà in sene un progjet dai Colonos in lenghe furlane, che al à debutât vie pal Istât inte rassegne “Avostanis”: “De profundis. Pre Toni Beline e Oscar Wilde”, ven a stâi dôs formis di dolôr e di amôr, une leture teatrâl cun Martina Delpiccolo e Fabiano Fantini. Vincj agns indaûr, intal 2004, al vignive stampât il “De profundis” di pre Toni Beline, par cure de Associazion culturâl Glesie Furlane, che chest an e fâs cincuante agns. Un libri autobiografic, introspetîf, sclet e profont de soference provocade de dialisi, che al devente une riflession su temis universâi e imortâi: il mâl, il dolôr, la pôre, la sperance. Un secul indaûr, al jere jessût a Londre il “De profundis” di Oscar Wilde, cinc agns daspò de muart dal scritôr inglês: une lungje letare scrite di Wilde intal 1897 de preson là che si cjatave di cuasi doi agns. Martina Delpiccolo e Fabiano Fantini a realizin un svicinament ardît e inedit des dôs oparis, dome sugjerît di pre Beline intes primis pagjinis dal so test e definît “istintîf” e “ocasionâl”. (A.I.) – 16.12.2024