Il disc pe pâs di Francesco Bearzatti

Un dai miôr fîs dal Friûl musicâl dai ultins agns, il saxofonist Francesco Bearzatti, nassût tal 1966 a S. Martin dal Tiliment, dispès di cjase a Parîs e innomenât almancul a nivel european, al à a pene publicât un disc cuntun titul sclet: “The peace concert”, il conciert pe pâs, jessût pe cjase discografiche dal Parco della Musica “Ennio Morricone” di Rome. Un progjet nassût un pâr di agns indaûr, cuant che Flavio Massarutto, il diretôr artistic di “S. Vito Jazz” al veve domandât a Bearzatti un progjet gnûf, fat cuntun cuartet di arcs: chel de academie “Arrigoni” di S. Vît dal Tiliment. Pensât, scrit e regjistrât cuant che al jere za dificil fevelâ di pâs, l’album al ven fûr tun moment di disorientament, il piês vivût no dome de Europe, ma forsit di dut il Mont di almancul 60 agns. Il disc, scrit par un cuartet classic – Federico Casagrande ae ghitare, Alessandro Turchet al bas e U. T. Gandhi aes percussions – al è fat di cuatri ‘moviments’ cence titul ma cun dome un numar. Achì, il dopli cuartet – chel jazz e chel classic – si cjatin propit tal mieç, di là di ogni convenzion. I altris trê tocs a son la version di “People Have the Power” di Patti Smith, par ribati che “si pues ancjemò lotâ par cambiâ il mont”, un toc origjinâl dedicât al musicist e ativist Charlie Haden e un omaç a un cine talian dal neorealisim, “GuardieLadri”. (A.I.) – 30.03.2026