Il diari di une partigjane

Il Teatri Stabil Furlan al da acet dentri de sô rassegne “Savôrs” a une anteprime dal spetacul “L’altra da me” (Chê altre di mê) inte Sale TSF de sô gnove sede su Via della Vecchia Filatura a Torean di Martignà, di vinars ai 8 e fint a sabide ai 9. La storie e scomence cuntun diari scrit di scuindon di une zovine, che e fevele a cualchidun cence savê che un dì e sarès stade scoltade: une combatente partigjane e antifassiste obleade a scuindîsi. Il ritrat sorprendent di Maria Antonietta Moro, traviers di pagjinis cjatadis fûr di sô fie dome daspò de sô muart, al à inspirât la gnove produzion, cuntun test di Lisa Moras e protagonistis Eleonora Marchiori e Giulia Cosolo. (A.I.) – 07.05.2026