Il dì di Buffalo Bill a Udin

Al è sucedût cent e vincj agns indaûr e la storie e je jentrade te liende. Te gnot dai 10 ai 11 di Mai dal 1906, un grum di int di Udin no là a durmî par viodi rivâ il ‘circ’ dal West american: il Wild West Show di Buffalo Bill, nassût William Frederick Cody, tal 1846, une des primis stelis mondiâls no dome pe sô part te epopee de ‘concuiste dal Ocident’ american, ma pal so contribût ae industrie dal intratigniment. Daspò di ve copât miârs di bisonts, cjaçât indians e cjapât medaiis, al decidè di meti adun dutis lis storiis vivudis par un grant spetacul ator dal so Paîs prime e in dut il mont daspò, rivant fint a Triest e Udin, cun cualchi desene di trens. Aes 5 di buinore, la int che e veve jemplât lis stradis dongje de stazion e tacà a viodi centenârs di oms e feminis (800 in sene, di dut il Mont: un miâr in totâl!), 500 cjavai, lis monturis e dut il rest, menâts in procession fint ae place des armis fûr de puarte Praclûs, dongje di Planis, là che a tacarin a tirâ su lis tendis in pocjis oris. L’ultin a rivâ al fo Buffalo Bill, l’eroi contrastât des vueris indianis, pront par presentâ in doi spetacui par almancul 20 mil personis la epopee dal “West”. Cheste misture di storie e fantasie che in 25 agns e rivà a tirâ dentri 17 milions di spetatôrs in Americhe e Europe, al è deventât un spetacul metût adun di Valerio Marchi. “Buffalo Bill tra storia e leggenda” al torne sul palc martars ai 12 tal Teatri “S. Giorgio” cun Valerio e la fie Michela Marchi a contâ la storie di chest eroi popolâr e la musiche dai fradis Alessio e Giuliano Velliscig. (A.I.) – 11.05.2026