Il prin al fo tal 1990 a Rome, te place San Giovanni, là che si è davuelt cuasi cence polse e à sburtât ancje altris citâts de Italie a celebrâ la fieste dal lavôr e dai lavoradôrs compagnâts de musiche di grandis stelis e artiscj no masse nomenâts. Cumò ancje a Udin, in place Venerio, là che vinars al Prin di Mai si fasarà la edizion di scree dal concierton furlan, “Primo Maggio Udine”. Un grant event dedicât ae sigurece sul lavôr e ae memorie di Lorenzo Parelli, un student di 18 agns di Morsan di Strade muart tal Zenâr 2022 tal ultin dì di scuele lavôr intune aziende. Sostignude dai sindacâts CGIL e CISL di Legacoop e Confcooperative, Coop Alleanza 3.0, Culture Arti e Saperi, cu la colaborazion dal Comun di Udin, la “edizion zero” o di prove e sarà un grant event a jentrade libare cence sore nuie, par ducj e dutis, fat su dal bas adun cu la comunitât. Une fieste che e met adun musiche e gnovis gjenerazions tal dì che al celebre lis concuistis sociâls e umanis fatis tal mont dal lavôr. A tacâ des 4 di dopomisdì e fint a miezegnot, te place “dai lens”, trê associazions furlanis che a lavorin te culture e tai spetacui – Vieni con me, Simularte e Stage Plan – a an metût adun un program siôr. Il cjantautôr Mattia Cilio, diretôr artistic dal event, al sarà il presentatôr sul palc adun cul comic furlan Marco Del Ben, in art ‘Marcutti’. In program, Tre Allegri Ragazzi Morti, il grup pordenonês di Davide Toffolo, un dai plui impuartants dal rock “alternatîf” talian, il rapper cjargnel Doro Gjat, Cinque Uomini Sulla Cassa del Morto, Laca Collective, Dodi & i Monodi e altris. (A.I.) – 30.04.2026
Foto di A. Martin
